ذكريات

فاكر شعورك وانت نفسك تخلص ابتدائى وتكبر وتروح اعدادى
طب فاكر حب ثانوى واول دقة قلب حسيتها ولا اللخبطه اللى كنت فيها
واول يوم رحت الجامعه وحسيت انك معدتش الطفل الصغير
يوم مانجحت وخلصت دراسه وانك خلاص بقيت من قوافل العاطلين
متنكرش ان فى الاول ليها فرحه ولو ليوم
يوم ما ربنا كرمك وجالك شغل وحسيت انك شخص مسئول
واول مرتب تقبضه وطعم الفلوس اللى جايه من تعبك
اكيد فى لحظات كتير حلوه فى حياتك زى ما فى لحظات مش كويسه بلاش تنسى الحلو وتتعب نفسك باللحظات التانيه
جمع كل اللحظات الحلوه اللى فى حياتك وخليها البنزين اللى يعينك على الحياه
لو كانت الحياه لحظات حلوه بس مكنتش هتحس بطعم الفرحه لما تيجى كان هيبقى فى ملل.... تخيل ان كل اللى انت عايزه بيتحقق وكل اللى بتحتاجه بيجيلك من غير تعب .... اكيد مكنتش هتحتفظ باى حاجه ولا تخاف على اللى عندك لانك عارف ان وقت ما تحتاجه هتلاقيه قدامك
باختصار حب كل لحظه بتمر عليك حتى لو وحشه طلع انت منها الحلو... وتاكد ان اللحظه الوحشه هتجيبلك بعدها اجمل وقت مكنتش تتخيله